கிழியும் எம்.கே.நாராயணனின் முகத்திரை…

எம்.கே.நாராயணன்

எம்.கே.நாராயணன் (75) என்றழைக்கப் படும் மாயன்கோட்டே கேளத் நாராயணன் தற்போது பாரதப் பிரதமரின் தேசியப் பாதுகாப்பு ஆலோசகராக இருந்து வருகிறார். இவரைப் பற்றிய விக்கீப்பீடியாவின் பக்கங்களில், இலங்கை விவகாரங்களில் இவர் கைதேர்ந்தவர் என்று கூறப் பட்டிருக்கிறது.

எம்.கே.நாராயணன் சிவ சங்கர மேனன் மற்றும்
ராஜபக்ஷே சகோதரர்கள்

இலங்கை விவகாரங்களில் இவர் எப்படி கைதேர்ந்தவராக இருந்தார் என்பது இவர் ஆயிரக்கணக்கான தமிழர்கள் மடியக் காரணமாக இருந்தவர் என்பதிலிருந்து புலப்படும். நாராயணனுக்கு விடுதலைப் புலிகளை ஒழிக்க வேண்டும் என்பதற்கு சோனியா குடும்பத்திற்கு நெருக்கமானவர் என்பதை தவிர வேறு காரணங்களும் உண்டு.


தமிழ்நாடு கேடரை சேர்ந்த ஐபிஎஸ் அதிகாரியான எம்.கே.நாராயணன் ஆரம்பம் முதலே இந்தியாவின் உள்நாட்டு உளவுப் பிரிவில் (Intelligence Bureau) வில் பணியாற்றினார். IBல் ஆரம்பம் முதல் பணியாற்றியதால் இந்திரா காந்தி குடும்பத்தோடு நெருக்கமானார். இந்திரா காந்தி குடும்பத்தோடு நெருக்கமான அதிகாரிகள் யாரும் அவ்வளவு எளிதில் அந்தத் தொடர்பை எளிதில் விடமாட்டார்கள்.

இந்திரா காந்தி குடும்பத்தைச் சேர்ந்த யாரோ ஒருவர் எப்படியும் பதவியிலோ, அல்லது அதிகார மையத்திலோ இருப்பார்கள் என்பது குழந்தைக்குக் கூட தெரியும். அதனால் அந்த தொடர்பை உயர் அதிகாரிகள் பலரும், போஷாக்காக பாதுகாத்து வளர்த்து வருவது வழக்கம். அப்படித்தான், நாராயணனும் காந்தி குடும்பத்துடனான தொடர்பை பாதுகாத்து வந்தார்.




1989 முதல் 1990 வரை, IBன் தலைவராக இருந்தார் நாராயணன். பிறகு சில காலம் உளவுத் துறைக்கான கூட்டுக் குழுவின் தலைவராக இருந்தார். பிறகு 1991 தொடக்கத்தில், மீண்டும் IBன் தலைவராக ஆனார். 1992ல் ஓய்வு பெற்றார். இவர் IBன் தலைவராக இருந்த காலத்தில்தான் ராஜீவ் படுகொலை செய்யப் பட்டார்.


ராஜீவ் கொலை தொடர்பாக அமைக்கப் பட்ட ஜெயின் கமிஷன் முன் ஆஜராகி சாட்சியமளித்த இந்திய உளவுப் பிரிவின் (IB) இணை இயக்குநர் வத்சன் என்பவர் தான் சென்னையில் பணியாற்றி வந்ததாகவும், இந்தியாவுக்கும் இலங்கைக்கும் இடையே நடைபெற்ற அனைத்து வயர்லெஸ் செய்திகளையும், அவற்றை பகுப்பாய்ந்து பார்க்க (decode) தங்களிடம் வசதி இல்லாததால் தலைமையகமான டெல்லிக்கு அனுப்பி வைத்து விட்டதாகவும், தான் பதவியில் இருந்தது வரை அந்த செய்திகள் பகுப்பாய்வு செய்யப் படவேயில்லை என்று தெரிவித்துள்ளார்.


இதுதான், எம்.கே.நாராயணனின் லட்சணம். ஜே.என்.தீட்சித், மரணமடைந்தவுடன் ஜனவரி 2005ல் தேசிய பாதுகாப்பு ஆலோசகராக நியமனம் செய்யப் பட்டார் நாராயணன். எப்பேற்பட்ட திறமையான “தேசிய பாதுகாப்பு ஆலோசகர்” பார்த்தீர்களா நமக்கு ?


சிங்களக் காடையர்களால், புலம் கடந்த உதவி இல்லையெனில், இன்னும் ஏழேழு ஜென்மத்திற்கு, புலிகளை வெல்ல முடியாது என்பது அனைவரும் அறிந்ததே. ஈழத்தில் புலிகளுக்கெதிரான போரில், சிங்களனுக்கு, ஆயுதமும், பயிற்சியும், நிதியும் இந்தியா கொடுத்து உதவியதில், எம்.கே.நாராயணனுக்கு பெரும் பங்கு உண்டு.


நாராயணன் இத்தகைய பங்கு வகிக்கக் காரணம், தான் உளவுத் துறையின் தலைவராக இருக்கையில், தன் கண்ணில் மண்ணைத் தூவி, ராஜீவ் படுகொலை செய்யப் பட்டு விட்டாரே.. தனது பணிக்காலத்தில் தீராத கறையாக இப்படுகொலை (a blot in his career) என்ற பழிவாங்கும் உணர்ச்சியும், இலங்கை இனப்படுகொலையில், நாராயணனின் அதி தீவிர ஈடுபாட்டுக்கு ஒரு காரணம்.



இந்த நாராயணன், 1990ல் விடுதலைப் புலிகளுடன் தொடர்பு, தமிழகத்தில் சட்டம் ஒழுங்கு கெட்டு விட்டது என்று கருணாநிதியின் ஆட்சி கலைக்கப் பட்டதற்கு அப்போது உளவுத் துறையின் தலைவராக இருந்த இதே எம்.கே.நாராயணன் தான் காரணம்.


இப்போது தேசிய பாதுகாப்பு ஆலோசகராக பணியாற்றி வரும் எம்.கே.நாராயணின் ஆளுகையின் கீழ்தான், இந்தியாவின் உள் நாட்டு உளவுத் துறை,(IB) அயல் நாட்டு உளவுத் துறை (RAW) ஆகிய இரண்டும் வருகின்றன. நெடுங்காலமாக IBல் பணியாற்றியதால் IBயில் உள்ள செல்வாக்கு நாராயணனுக்கு RAWல் இல்லை.


RAW என்பதன் விரிவு Research and Analysis Wing அதாவது ஆய்வு மற்றும் பகுப்பாய்வு பிரிவு என்பதாகும். 1962 மற்றும் 1965ல் ஏற்பட்ட இரு போர்களுக்குப் பிறகு, அயல்நாட்டு உளவுக்கான தேவை அதிகரிக்கவும், செப்டம்பர் 1968ல் ரா உருவாக்கப் பட்டது.
இந்த “ரா“ அமைப்பின் வேலை, இந்தியாவுக்கு வெளியே, இந்தியாவின் நலன்களை பாதுகாக்கும் வகையில், உளவுத் தகவல்களை சேகரிப்பதுதான்.


அமெரிக்காவில், எஃப்.பி.ஐ மற்றும் சிஐஏ ஆகிய இரு பிரிவுகள், எப்படி, ஒருவரோடு ஒருவர் முரண்பாடாக இருப்பார்களோ, அதே போல்தான் இந்தியாவிலும், ஐபி, ரா ஆகிய இரண்டு பிரிவுகளின் அதிகாரிகளும், ஒருங்கிணைந்து பணியாற்றுவது மிகவும் குறைவு.


இந்நிலையில், இந்தியன் எக்ஸ்பிரஸ் நாளேடு, ரா நிறுவனத்தைப் பற்றியும், எம்.கே.நாராயணன் ரா துறையை தன்னுடைய கட்டுப்பாட்டில் கொண்டு வருவதற்காக எடுத்து வரும் பகீரத முயற்சிகளை பற்றி விரிவான தகவல்களை வெளியிட்டுள்ளது.

17.11.2009 இந்தியன் எக்ஸ்பிரஸ் நாளேட்டு செய்தி

18.11.2009 இந்தியன் எக்ஸ்பிரஸ் நாளேட்டு செய்தி

வரும் ஜனவரி 2010ல், தற்போதைய ரா வின் இயக்குநர் ஓய்வு பெற்றவுடன் எம்.கே.நாராயணின் கையாளாக கருதப்படும் அவ்தேஷ் பிகாரி மாத்தூர் என்பவர் பதவி ஏற்க உள்ளதாகவும், இந்த மாத்தூர் ரா வுக்கு தலைவராக பதவி ஏற்பதற்காகவே, நிதித் துறையின் முன் அனுமதி இல்லாமலே, ஒரே இரவில், “சிறப்புச் செயலாளராக” நாராயணனின் தூண்டுதலின் பேரில் பதவி உயர்த்தப் பட்டதாகவும், இது ரா வில் பணியாற்றும் பல உயர் அதிகாரிகள் மத்தியில் கடும் அதிருப்தியை ஏற்படுத்தியுள்ளது என்றும் தெரிவிக்கப் பட்டுள்ளது.

மேலும், மாத்தூரை விட, பணியில் மூத்த நான்கு அதிகாரிகள் அதிருப்தி அடைந்த 6 அதிகாரிகள் பி.எம்.ஹெப்லிக்கர், பிதன் ரவால், சி.கே.சின்ஹா, ஆனந்த் ஆர்னி, மற்றும் அஷோக் கபூர் ஆகியோர் விடுப்பில் சென்று விட்டதாகவும் தகவல் வெளியாகியுள்ளது. இவர்களில் அஷோக் கபூர் இந்த பதவி உயர்வை எதிர்த்து மத்திய நிர்வாக தீர்ப்பாயத்தை அணுகியுள்ளதாகவும் தகவல் வெளியாகியுள்ளது.


மேலும், நெடு நாட்களாகவே, ரா விலிருக்கும் அதிகாரிகளை விட்டு விட்டு வெளி ஆட்களை (பிற துறைகளில் இருந்து) நாராயணன் தொடர்ந்து நியமித்து வருவதாகவும் தகவல்கள் தெரிவிக்கின்றன. அதிகாரிகளை விடுப்பில் செல்ல வேண்டாம் என்று தான் நடத்திய கூட்டத்தில் தெரிவித்த தற்போதைய ரா வின் தலைவர் கே.சி.வர்மா, “தனது கைகள் கட்டப் பட்டுள்ளது“ என்று தெரிவித்துள்ளதாகவும் தெரிகிறது.


விடுப்பில் சென்றுள்ள அதிகாரிகளுக்கு, 25 ஆண்டு காலமாக ரா நிறுவனத்தில் உழைத்து, பதவி உயர்வில் தாங்கள் விடுபட்டது மட்டும் வருத்தமல்ல, தற்போது ரா இயக்குநராக பதவி ஏற்க உள்ள மாத்தூரின் பணிக் காலம் முழுவதும், அதிகார மையத்திற்கு நெருக்கமாக இருந்ததும், பண முதலைகளின் பிடியில் இருந்ததும், பணிக்காலம் முழுவதும் ஒழுங்காக பணியாற்றாமல் இருந்ததும் தான் இந்த அதிகாரிகளுக்கு கடுமையான மன வருத்தத்தை ஏற்படுத்தியுள்ளது.


இந்த மாத்தூர் தனது பணிக்காலத்தில் எப்படி பணியாற்றினார் என்பதை இப்போது பார்ப்போம்.


இந்த மாத்தூர் பெல்ஜியம் நாட்டில் பணியாற்றி விட்டு, பாகிஸ்தானில் பணியாற்றிய போது, பெல்ஜியம் தலைநகர் ப்ரஸ்செல்ஸில் இவரது வங்கிக் கணக்கில் 1,25,000 அமெரிக்க டாலர்கள் இருந்தது கண்டு பிடிக்கப் பட்டது. இந்தத் தொகை, இவர் பணிக்காலம் முழுவதும் சம்பாதிக்கும் ஊதியத்தை விட அதிகம் என்று தகவல்கள் தெரிவிக்கின்றன.
இந்தத் தொகை பற்றி நடைபெற்ற விசாரணையில் எந்த முன்னேற்றமும் ஏற்படவில்லை.

இது தவிர, மாத்தூர் பாகிஸ்தானில் இருந்த போது ஏற்பட்ட சம்பவங்கள் தான் மிகப் பெரிய சர்ச்சையை ஏற்படுத்தியது.


ரா பிரிவில் பணியாற்றும் ஒரு அதிகாரிக்கு, பாகிஸ்தான் போஸ்டிங் தான் இருப்பதிலேயே மிகக் கடினமான ஒரு பதவி. ஏனெனில் நெடு நாள் பாகிஸ்தானோடு நமக்கு இருந்து வரும் பகைதான் காரணம். ஆனால் மாத்தூர் பாகிஸ்தானில் இருந்த போது, பாகிஸ்தான் உளவுத் துறையான ஐஎஸ்ஐ மாத்தூரைப் பற்றி எவ்வித கவலையும் படாமல் இருந்துது மிகவும் அசாதாரணமான ஒன்று என்று தகவல்கள் தெரிவிக்கின்றன.


வழக்கமாக பாகிஸ்தானில் உள்ள இந்திய அதிகாரிகள் கடுமையாக கண்காணிக்கப் படுவர். ஆனால், மாத்தூர் மற்றும் அவரது மனைவி ஷாப்பிங் சென்ற போது கூட, பாகிஸ்தான் உளவுத் துறை அதிகாரிகள் ஒருவரும் அவரை கண்டு கொள்ள வில்லை என்பது மிகுந்த சந்தேகத்தை ஏற்படுத்துவதாக உள்ளது.


பாகிஸ்தான் பணி என்பது எந்த ரா அதிகாரிக்கும், தூங்குவதற்குக் கூட நேரம் இல்லாத அளவுக்கு கடும் நெருக்கடியை கொடுக்கும் பணியாகும். ஆனால் மாத்தூர் பல முறை அரபு நாடுகளுக்கு சென்று வந்திருக்கிறார் என்பது மேலும் இவரைப் பற்றிய சந்தேகத்தை வலுப்படுத்துகிறது.


இப்படிப் பட்ட மாத்தூர் “ரா” வின் தலைவராக வந்தால் இந்தியா எங்கே செல்லும் என்று சற்றே எண்ணிப் பாருங்கள்.

எம்.கே.நாராயணன் பற்றிய மேலும் தகவல்களுக்கு சவுக்கை தொடர்ந்து படியுங்கள்.

சவுக்கு

மனித குல வரலாற்றில் மிகப் பெரிய துரோகி யார் ?

ப்ரூட்டஸ்: ஜுலியஸ் சீசரின் ரோமானிய சாம்ராஜ்யத்தில், அமைச்சரவையில் இடம் பெற்றிருந்த, சீசரின் நெருங்கிய உறவினர் ப்ரூட்டஸ் செய்த துரோகம், வரலாற்றில் மிகவும் புகழ் பெற்றது. அகில சக்திகளையும் ஒருங்கே கொண்டிருந்த சீசரை, ப்ரூட்ஸ் அவரது மனைவி தடுத்தும் கேட்காமல் கொன்றார்.



வாங் ஜிங் வேய்: 1921ம் ஆண்டு பிறந்த சீனரான இவர், நெருக்கடியான நேரத்தில், தன் தாய் நாட்டுக்கு எதிராக ஜப்பானியர்களோடு அணி சேர்ந்ததற்காக இவரும் மிகப் பெரிய துரோகி என்று வரலாற்றில் இடம் பெறுகிறார்.



ரோசன்பர்க் தம்பதியர்: அமெரிக்கா மற்றும் சோவியத் நாட்டுக்கிடையே பனிப்போர் நடந்து கொண்டிருந்த வேளையில், அணு மற்றும் பல்வேறு அமெரிக்க ரகசியங்களை சோவியத் நாட்டுக்கு விற்றதாக குற்றம் சாட்டப் பட்டனர். பிறகு இவர்கள் இருவரின் உளவு வேலைகள் கண்டு பிடிக்கப் பட்டு 1953ம் ஆண்டு மரண தண்டனை விதிக்கப் பட்டனர்.



பெனடிக்ட் அர்நால்ட்:16ம் நூற்றாண்டில் அமெரிக்க தளபதியாக இருந்த இவர் அமெரிக்காவுக்கும் பிரிட்டனுக்கும் இடையே நடந்த போரில், அமெரிக்க ராணுவ தளபதியாக இருந்தாலும், அமெரிக்க கோட்டையை, பிரிட்டனுக்கு விட்டுக் கொடுத்து அமெரிக்காவுக்கு துரோகம் இழைக்க முயற்சி செய்தார். பின்னர் கடல் வழியே தப்பித்து கனடா நாட்டில் 1801ல் இறந்தார். ராணுவ வீரராக இருந்து தாய் நாட்டுக்கு இழைத்த துரோகத்துக்காக இவர் வரலாற்றில் இடம் பெறுகிறார்.



ஆல்ட்ரிக் ஏம்ஸ்: அமெரிக்க உளவு நிறுவனமான சிஐஏ வில் முக்கிய பொறுப்பில் இருந்த இவர், 1985ம் ஆண்டு வாஷிங்டன் நகரில் உள்ள சோவியத் தூதரகத்தில் நுழைந்து, அமெரிக்க ரகசியங்களை பணத்துக்காக விற்றார். இவர் விற்ற ரகசியங்களால் ஏறக்குறைய 100 அமெரிக்காவின் ராணுவ நடவடிக்கைகளை முடிவுக்கு வந்தன. இவ்வாறு விற்ற ரகசியங்களுக்காக 4.6 மில்லியன் டாலர்கள் லஞ்சமாக பெற்றார். அமெரிக்கா சந்தித்த மிகப் பெரிய உளவு தோல்வி இது. இதை நடத்தி வைத்ததற்காக ஏம்ஸ் வரலாற்றில் இடம் பெறுகிறார்.



விட்குன் க்விஸ்லிங்: நார்வே நாட்டைச் சேர்ந்த இவர், 1933ம் ஆண்டு தேசிய ஒற்றுமை கட்சி என்ற ஒரு கட்சியை தொடங்கினார். ஹிட்லரின் விசுவாசியாக இருந்த இவர், ஹிட்லர் படையெடுத்து வரும் முன்பே, நார்வே நாட்டின் ராணுவ யுத்திகள் அத்தனையும், ஹிட்லருக்கு தெரிவித்து விட்டார். இதனால் படையெடுப்பு நடக்கையில் எளிதாக நார்வேயை வென்ற நாஜிக்கள், வென்றதும், க்விஸ்லிங்கை நார்வே நாட்டின் அதிபராக நியமித்தனர். இரண்டாம் உலகப் போர் முடிவடைந்ததும், 1945ம் ஆண்டு, இவருக்கு மரண தண்டனை விதிக்கப் பட்டது. நார்வே நாட்டை காட்டிக் கொடுத்ததற்காகவும், நார்வே நாட்டு மக்களால் மிகவும் வெறுக்கப் பட்டதற்காகவும், இவர் மிகப் பெரிய துரோகி என்று வரலாற்றில் இடம் பெறுகிறார்.



யூதாஸ்:ஏசுவின் 12 சீடர்களில் ஒருவரான யூதாஸ் 30 வெள்ளிக் காசுகளுக்காக ஏசுவை காட்டிக் கொடுத்தார். அதிகாரிகள் வருகையில் “நான் ஏசுவை முத்தமிடுகிறேன் அதை வைத்து ஏசுவை கைது செய்து கொள்ளுங்கள்“ என்று கூறி காட்டிக் கொடுத்ததால், ஏசு கைது செய்யப் பட்டு சிலுவையில் அறையப் படுகிறார். இதனால், வரலாற்றின் புகழ் பெற்ற “துரோகி“ ஆகிறார்.

இவர்களையெல்லாம் விட மிகப் பெரிய துரோகி யாராவது உண்டா ? உண்டு நண்பர்களே. உண்டு.

அந்தத் துரோகிதான் “கருணாநிதி“.



இவர்களெல்லோரையும் விட மிகப் பெரிய துரோகியாக கருணாநிதி பட்டம் பெற என்ன காரணம் ?

ஈழப் போரை கருணாநிதி தடுத்து நிறுத்தவில்லை என்று, தமிழகம் முழுக்க ஓலங்கள் கேட்டபோதெல்லாம், கருணாநிதி ஆதரவாளர்கள் இவர் என்ன செய்ய முடியும் ? எல்லாம் மத்திய அரசின் கையில் தானே உள்ளது, இவர்தான் போராட்டம் நடத்துகிறாரே என்று கூறுவர். ஆனால், தற்போது உள்ள ஐக்கிய முற்போக்கு கூட்டணி அரசை விட, கடந்த அரசில், கருணாநிதிக்கு இருந்த செல்வாக்கு அளவில்லாதது. கருணாநிதி சொன்னால் நடக்காதது எதுவுமே இல்லை.



கருணாநிதி கடிதம் எழுதினால், உடனே பிரணாப் முகர்ஜி கோபாலபுரத்தில் வந்து மண்டியிடுவார். ஆனாலும், கருணாநிதி, நாடகம் மட்டுமே நடத்துகிறார், உண்மையில் தமிழர்கள் மீது எவ்வித அக்கறையும் இல்லை என்பதை சோனியா நன்றாகவே உணர்ந்திருந்தார். அதனால்தான், இறுதிப் போரில் அத்தனை தமிழர்கள் மீது குண்டுகள் வீசப்பட்டுக் கொண்டிருக்கும் போதும் கூட கருணாநிதி பல “கண்ணீர்” நாடகங்களை நடத்திக் கொண்டிருந்தாரே தவிர, உருப்படியாக எதுவும் செய்யவில்லை.



கருணாநிதி நினைத்திருந்தால், யுத்தம் நின்றிருக்கும் என்பது குழந்தைக்குக் கூட தெரியும். ஆனால், கருணாநிதி நினைவில், ஈழத் தமிழர்கள் இல்லை. தன் குடும்பத்தினர் மட்டுமே இருந்தனர்.

மூன்று மணிநேரம் உண்ணாநோன்பு நோற்று ‘இராசபக்சே போர் நிறுத்தத்தை அறிவித்துவிட்டார்’ என்று சொல்லி உண்ணா நோன்பை முடித்து சாதனை படைத்தவர் கருணாநிதி ஒருவர்தான். அவரிடம் ‘இன்று காலையில் கூட விடுதலைப் புலிகள் மீது கன ரக ஆயுதங்களைப் பயன்படுத்தி தாக்குதல் நடைபெற்றதாக செய்திகள் வந்திருக்கிறதே?’ என்று செய்தியாளர்கள் கேட்ட போது ‘மழை விட்டும் தூவானம் விடவில்லை’ என்று பதில் இறுத்தது கடைந்தெடுத்த அயோக்கியத்தனம்!


தமிழீழ மக்களுக்காகக் குரல் கொடுத்த தமிழ் உணர்வாளர்கள் இயக்குநர் சீமான், கொளத்தூர் மணி, தஞ்சை மணியரசன், நாஞ்சில் சம்பத், கோவை இராமகிருஷ்ணன் போன்றோரை தேசியப் பாதுகாப்புச் சட்டத்தின் கீழ் கைது செய்து சிறையில் அடைத்தது கருணாநிதியின் அதிகார வெறியல்லவா?


இனமா? பதவியா? என வந்தபோது பதவிதான் முக்கியம் என முதல்வர் கருணாநிதி முடிவெடுத்தார்



தமிழ்நாட்டுக்கு அகதிகளாக ஓடிவந்த ஈழத் தமிழர்களை செங்கல்பட்டு மற்றும் பூந்தமல்லி சிறப்பு முகாம்கள் எனப்படும் வதை முகாம்களில் ஆண்டுக்கணக்காக அடைத்து வைத்து அழகுபார்க்கும் ஒரே முதல்வர் கருணாநிதிதான்



இலங்கையில் நடந்த இறுதிக் கட்டப் போரில் முன்னணியில் நின்று போரை நடத்திய தளபதி பொன்சேகா தனது பதவியை ராஜினாமா செய்கையில் இராணுவம், சதி முயற்சிகளில் ஈடுபடுவதாக சந்தேகித்து 2009 அக்டோபர் 15ஆம் திகதி இந்திய அரசாங்கத்தை எச்சரிக்கையாக இருக்குமாறும் அந்நாட்டு இராணுவத்தை மிகவும் அவதானமாக செயற்படுமாறும் அறிவிக்கப்பட்டது என்று தெரிவித்துள்ளார்.
இந்த விஷயம் இன்று வரை இந்திய அரசாங்கத்தால் மறுக்கப் படவில்லை என்பது குறிப்பிடத் தக்கது. இப்படி ஈழப் போரில் இந்தியாவின் / சோனியாவின் பங்கு வெளிப்படையாக தெரிந்த நிலையில்தான் பிரணாப் முகர்ஜி இலங்கை சென்று ராஜபஷேவை சந்தித்து, தமிழகம் திரும்பி, சென்னை வந்தும் கருணாநிதியை சந்திக்காமல் திரும்பியுள்ளார்.



இந்தச் சூழ்நிலையில், கருணாநிதி, சென்னையில் நடந்த ஒரு விழாவில் என்ன பேசியுள்ளார் தெரியுமா ?

”திமுக - காங்கிரஸ் கூட்டணி தொடர்ந்து மேலும் பல ஆண்டுகள் நீடிக்கும். காங்கிரஸ் திமுக கூட்டணி தொடர வேண்டும் என்றும் இந்த கூட்டணி நிலைத்தால்தான் இந்தியாவும், தமிழகமும் வளமாக இருக்க முடியும்.

காங்கிரசுக்கும் திமுகவுக்கும் இடையே எந்த அளவிற்கு ஒற்றுமை உள்ளது என்பது குறித்து விரிவாக பேசுவதற்கு கால நேரம் போதாது.

காங்கிரஸ் திமுக கூட்டணி தொடர்ந்தால் தான் தமிழகத்திற்கு மேலும் நல்ல பல திட்டங்களை விரைவாக செயல்படுத்த முடியும் என்பது நாடு அறிந்த உண்மை.
சென்னையில் காங்கிரஸ் கட்சி சார்பில் கடற்கரையில் நடைபெற்ற ஒரு கூட்டத்தில் முன்னாள் பிரதமர் அன்னை இந்திரா காந்தி, என்னைப் பற்றியும், திமுக பற்றியும் எந்த அளவிற்கு புகழ்ந்து பேசினார் என்று இங்கே சிலர் எடுத்துக் கூறினார்கள். அந்த ஒற்றுமை இவ்விரு கட்சிகளிடையே மேலும் பல ஆண்டுகள் தொடர்ந்து நீடிக்கும் என்றார். ” என்று பேசியுள்ளார்.

இத்தனையும் செய்து விட்டு, "மொழிக்காக" மட்டும், தமிழ் மொழி மாநாடு நடத்தும் கருணாநிதியை என்ன சொல்லி அழைப்பீர்கள்.

துரோகி அல்லவா ? அதனால்தான் சொல்கிறேன். வரலாற்றில் மிகப் பெரிய துரோகி.. .. ..

முத்துவேல் கருணாநிதி

சவுக்கு

பத்திரிக்கைகள் மிகைப்படுத்தி செய்தி வெளியிடுகின்றதா ?

குறிப்பு: சற்றே பெரிய பதிவு. பொறுமையாக படிக்கவும்.

கருணாநிதி கடந்த 15ம் தேதி வெளியிட்டுள்ள அறிக்கையில் “பத்திரிக்கைகள் செய்திகளை மிகைப்படுத்தி வெளியிடுவதாக“ அறிக்கை வெளியிட்டுள்ளார். மேலும் அவர் அந்த அறிக்கையில் “பத்திரிக்கைகளுக்கு அரசின் வாயிலாக எத்தகைய அடக்கு முறைகள் தொடரப்பட்டாலும் அந்த நேரத்தில் எல்லாம் அவர்களுக்காக வாதாடியிருக்கிறேன், போராடியும் இருக்கிறேன்.

அதே நேரத்தில் பத்திரிக்கை சுதந்திரம் என்ற பெயரில் எதை வேண்டுமானாலும் எழுதலாம், எப்படி வேண்டுமானாலும் படம் போடலாம், யாரை வேண்டுமானாலும் அவர்களுக்குரிய மானம், மரியாதைக்கு மாசு ஏற்படும் வகையில் எழுதாலம், பேசலாம் என்று எவர் ஒருவரும் கருதிக் கொண்டு “என் வழி இதுதான்“ என்று வழி மீறுவார்களானால், அது பற்றிய முறையீடு பாதிக்கப்பட்டவர்களால் தெரிவிக்கப் படும் பொழுது அதை எந்தவொரு அரசும் பார்த்து ரசித்துக் கொண்டிருக்க முடியாது.

அப்படிப்பட்ட நேரத்திலே கூட இந்த அரசினால் எடுக்கப் படுகின்ற நடவடிக்கைகள் பத்திரிகைகளை எதிர்த்து மூர்த்தன்யமாகவோ, முரட்டுத்தனமாகவோ, இதுவரை எடுக்கப்பட்டதாக யாரும் கூற முடியாது. என் இத்தகைய மென்மைனாய அணுகுமுறையை, இரு சாராருக்கிடையயே பகை பரவிடக்கூடாது என்ற பரந்த நோக்கத்தோடு எச்சரிக்கையாக கையாளும் அணுகுமுறையை, என் மீது வேண்டுமென்றே குறை கூற விரும்புவோர் கடுமையாக விமரிசிப்பதையும் நான் புரிந்து கொள்ளாமல் இல்லை.



பத்திரிக்கையாளர்களுக்கு நான் நண்பன் என்பதால்தான் அவர்கள் எழுப்புகின்ற கோரிக்கைகளையெல்லாம் நிறைவேற்றி வந்திருக்கிறேன்.

மழையினால் தகர்ந்த சாலைகள் சரி செய்யப் பட்டு விட்டது, மீண்டும் போக்குவரத்து தொடங்கி விட்டது, இயல்பான வாழ்க்கை அமைந்து விட்டது என்ற செய்திகள் வந்தும் கூட இன்னும் சில ஏடுகளில் அங்கே நிவாரணப் பணிகள் நடக்கவில்லை என்பதைப் போல சிலர் விடுத்துள்ள அறிக்கைகள் பெரிய அளவில் பிரசுரிக்கப்பட்டிருப்பதைக் காணுகிறேன்“ என்று அந்த அறிக்கையிலே தெரிவித்துள்ளார்.

கருணாநிதி அவ்வப்போது போடும் வேஷங்களிலே ஒன்று “நானும் பத்திரிக்கையாளன்தான், நான் பத்திரிக்கையாளர்களின் நண்பன்“ என்பது.

உண்மையில் தன் மீதும், தனது குடும்பத்தினர் மீதும் தவிர, வேறு யார் மீதும் கருணாநிதிக்கு உண்மையான அக்கறை கிடையாது என்பதை நாடறியும்



முதலில் கருணாநிதி பத்திரிக்கையாளர்களின் உண்மையான நண்பனா என்பதை பார்ப்போம். கடந்த ஏப்ரல் 2008ல் முன்னாள் தலைமைச் செயலாளர் திரிபாதி மற்றும் லஞ்ச ஒழிப்புத் துறை இயக்குநர் உபாத்யாய் ஆகியோருக்கிடையே நடைபெற்ற உரையாடல் “டெக்கான் க்ரானிக்கிள்“ நாளிதழில் வெளியாகி, அது தொடர்பாக ஓய்வு பெற்ற நீதிபதி சண்முகம் தலைமையில் விசாரணை கமிஷன் அமைக்கப் பட்டது.

நீதியரசர் (??????) சண்முகம்

அந்த கமிஷனில் இந்த உரையாடல் தொடர்பாக செய்தி வெளியிட்ட பல பத்திரிக்கையாளர்கள் விசாரிக்கப்பட்டனர். இதற்குப் பிறகு லஞ்ச ஒழிப்புத் துறையில் பணியாற்றிய சங்கர் என்பவர் விசாரிக்கப் பட்டார்.

சங்கர் வைத்திருந்த செல்பேசியில் பேசினார்கள் என்ற ஒரே காரணத்திற்காக “மக்கள் டிவி“ நிருபர் ரவிச்சந்திரன், “டெகல்கா“ நிருபர் வினோஜ், “டெக்கான் க்ரானிக்கிள்“ நிருபர் அருண் குமார் மற்றும் “ஜூனியர் விகடன்“ இதழின் இணை ஆசிரியர் விகேஷ் ஆகியோர் கமிஷனால் பல முறை விசாரணை என்ற பெயரில் அலைக்கழிக்பப் பட்டனர்.

சண்முகம் கமிஷன் சுதந்திரமாக செயல்பட்டது என்று ஊருக்காக “கதை“ சொன்னாலும், சலுகை பெறுவதற்காக, கருணாநிதியின் விருப்பத்திற்கிணங்கவே சண்முகம் செயல்பட்டார் என்பது, அவர் அளித்த அறிக்கையிலும், அதற்கு அடுத்த விசாரணை கமிஷனுக்கு சண்முகமே நீதிபதியாக நியமிக்கப் பட்டதிலும் தெரிய வந்தது.



சண்முகம் கமிஷன், மேற்கூறிய 4 பத்திரிக்கையாளர்கள் மீதும், கிரிமினல் வழக்கு பதிவு செய்யப் படவேண்டும் என்று பரிந்துரை செய்தது. ஆனால், கருணாநிதி அரசு பெருந்தன்மையாக பத்திரிக்கையாளர்களின் நண்பன் போல வேடமிட்டு, பத்திரிக்கையாளர்களின் மீதான பரிந்துரையை மட்டும் நிராகரித்தது.


அடுத்த நிகழ்வு, “தினமலர்“ தொடர்பானது. தினமலர் நாளேடு, நடிகைகளைப் பற்றி மிகவும் அவதூறாக எழுதியதை யாரும் நியாயப் படுத்த முடியாது. ஆனால், அதற்கு பாதிக்கப் பட்டவர்கள் நீதிமன்றத்தை அணுகி உரிய நிவாரணம் தேடுவதுதான் சட்டப் படியான வழி.


ஆனால் என்ன செய்தார் கருணாநிதி ? நடிக நடிகையர் கூட்டம் போட்டு கூச்சல் போட்டவுடன் “பெண்களுக்கெதிரான வன்கொடுமைச் சட்டத்தின்“ கீழ், அந்நாளேட்டின் செய்தி ஆசிரியர் லெனின் கைது செய்யப் பட்டார். வழக்கமாக அவதூறு செய்திகள் தொடர்பாக ஒரு நாளேட்டின் ஆசிரியர் மற்றும், பதிப்பாளர் ஆகியோர்தான் நடவடிக்கைக்கு ஆளாவார்கள்.

தினமலர் செய்தி ஆசிரியர் லெனின் கைது செய்யப் படுகையில்

ஆனால், இந்நிகழ்வில், வினோதமாக செய்தி ஆசிரியர் கைது செய்யப் பட்டார். அது, முதலாளிகளோடு கருணாநிதி செய்து கொள்ளும் சமரசம்.


மறுநாள் பத்திரிக்கையாளர்கள் சாலை மறியல் மற்றும் பல போராட்டங்களில் இறங்கியவுடன், லெனினின் பிணை மனுவுக்கு அரசு வழக்கறிஞர் ஆட்சேபம் தெரிவிக்காமல் உடனடியாக பிணையில் வெளி வர ஏதுவாக நடவடிக்கை எடுத்த கருணாநிதியின் நடத்தை, “பாம்புக்கு தலையையும், மீனுக்கு வாலையும்“ காட்டுவதல்லாமல் வேறு என்ன ?

அடுத்த நிகழ்வு, “நெற்றிக்கண் மணி“ பற்றியது. நெற்றிக்கண் மணி, ஒரு நேர்மையான பத்திரிக்கையாளரா இல்லையா என்பது பற்றிய விவாதம் வேறு.

ஆனால் என்ன செய்தி வெளியிட்டார் என்பதற்காக அவர் கைது செய்யப் பட்டார் என்பதுதான் முக்கியம். நவீன நெற்றிக்கண் இதழில், சமீபத்தில், மத்திய அமைச்சர் மு.க.அழகிரி, காண்டிராக்டர் சுரேஷ் ஆகியோர் குறித்த செய்தி ஒன்று வெளியாகியிருந்தது. அதில் சாலை காண்டிராக்ட் பணியில் பெருமளவில் முறைகேடு நடந்திருப்பதாக கூறப்பட்டிருந்தது. காண்டிராக்ட் கொடுக்கப்பட்டவர்கள் குறிப்பிட்ட சதவீதத் தொகையை கமிஷனாகத் தர வேண்டும் என வற்புறுத்தப்பட்டதாகவும், அதேபோல தென் மாவட்டங்களில் காவல்துறை, வருவாய்த்துறை உள்ளிட்ட பல்வேறு துறைகளில் சுரேஷ் பரிந்துரைக்கும் நபர்களே இடம் பெறுவதாகவும் அதில் கூறப்பட்டிருந்தது.


இதையடுத்து நெற்றிக்கண் ஆசிரியர் மீது சுரேஷ் போலீஸில் புகார் கொடுத்தார். அதன் பேரில் அக்டோபர் 25ம் தேதி ஆசிரியர் மணி கைது செய்யப்பட்டார். பின்னர் மதுரை கோர்ட்டில் ஆஜர் செய்யப்பட்டு சிறையில் அடைக்கப்பட்டார்.


இந்த பொட்டு சுரேஷ் யார் தெரியுமா ? திமுகவின் முன்னாள் அமைச்சர் தா.கிருஷ்ணனின் கொலை செய்யப் பட்ட வழக்கில் முக்கிய குற்றவாளி. இவரைப் பற்றி “நெற்றிக் கண்“ பத்திரிக்கையில் எழுதியதற்காகத் தான் இவர் கைது செய்யப் பட்டுள்ளார்.

எப்படி இருக்கிறது கருணாநிதியின் பத்திரிக்கை தர்மம் ?

இதோடு முடியவில்லை. சென்னை பத்திரிக்கையாளர்கள் சங்கத்தை, உளவுத் துறையின் உதவியோடு இரண்டாக உடைத்துள்ளார். இதனால், பத்திரிக்கையாளர்கள், முழுமையாக ஒன்றுபட இயலாமல், குழுக்களாக செயல்பட்டுக் கொண்டுள்ளனர்.

இதெல்லாவற்றையும் விட, கருணாநிதியின் கோபம், அவரது அறிக்கையின் கடைசி பத்தியில் உள்ளது.

“இயல்பான வாழ்க்கை அமைந்து விட்டது என்ற செய்திகள் வந்தும் கூட இன்னும் சில ஏடுகளில் அங்கே நிவாரணப் பணிகள் நடக்கவில்லை என்பதைப் போல சிலர் விடுத்துள்ள அறிக்கைகள் பெரிய அளவில் பிரசுரிக்கப்பட்டிருப்பதைக் காணுகிறேன்“

என்ன கோபம் என்பது தெரிகிறதா ? ஜெயலலிதாவின் அறிக்கையை பெரிய அளவில் பத்திரிக்கைகள் பிரசுரித்ததுதான் கருணாநிதியின் கோபத்திற்கு மிகப் பெரிய காரணம்.


கருணாநிதியின் அறிக்கைகளை பிரசுரிப்பதற்கு, முரசொலி, Rising Sun, தினகரன், மற்றும் வார இதழ்கள், குங்குமம், மற்றும் காட்சி ஊடகங்கள், கலைஞர் டிவி, கலைஞர் செய்திகள், சன் டிவி, சன் நியூஸ் ஆகிய ஊடகங்கள் இருக்கிறது. ஆனாலும், ஜெயலலிதாவின் அறிக்கையை, சில பத்திரிக்கைகள் பெரிதாக போட்டு விட்டால், கருணாநிதிக்கு வருகிறதே கோபம் !


இந்தக் கோபத்திற்கு காரணம்,

கருணாநிதியின் அகம்பாவமும் திமிருமேயன்றி வேறு இல்லை.

தான்தான் தமிழ், தான்தான் தமிழ்நாடு, என்று அவர் அருகிலிருந்து தொடர்ந்து துதிபாடும் பிச்சைக் காரர் கூட்டம் போலவே, தமிழ்நாடு முழுவதும் அவர் பேச்சைக் கேட்டு ஆடவேண்டும் என்ற ஆணவம் தான் காரணம்.

“வல்லவனுக்கு வல்லவன் வையகத்தில் உண்டு“ என்பதை கருணாநிதி மறந்து விட்டார் போல.

சவுக்கு

மனித உரிமை நாள் டிசம்பர் 10ல் மரண தண்டனை ஒழிப்பு மாநாடு

வரும் டிசம்பர் 10 சர்வதேச மனித உரிமை நாளாகும். இந்நாளில் கீழ்கண்ட கோரிக்கைகளோடு "ஒழியட்டும் மரண தண்டனை, மலரட்டும் மனித உரிமை" என்ற தலைப்பில் சென்னையில் மாநாடு நடைபெற இருக்கிறது. இம்மாநாட்டில் 5 கோரிக்கைகள் முன்னெடுக்கப் படுகின்றன.

1) பேரறிவாளன், முருகன், சாந்தன் உள்ளிட்டோரின் மரண தண்டனையை நீக்கம் செய்து விடுதலை செய்.

2) நளினி, ரவிச்சந்திரன், ராபர்ட் பயஸ், ஜெயக்குமார், தென்தமிழன், எஸ்.ஏ.பாட்சா, முகமது அன்சாரி உள்ளிட்ட பத்து ஆண்டுகளுக்கு மேல் உள்ள வாழ்நாள் சிறையாளிகளை விடுதலை செய்.

3) 12 ஆண்டுகளாக விசாரணைச் சிறையாளிகளாக உள்ள குணங்குடி அனீபா, ரஹீம், முபாரக், ராஜா உசேன், ஏர்வாடி காசிம், அலி அப்துல்லா ஆகியோரை விடுதலை செய்

4) போலி மோதல் - காவல் மரணத்திற்கு காரணமான காவல்துறை அதிகாரிகள் மீது கொலை வழக்கு பதிவு செய்.

5) செங்கல்பட்டு பூந்தமல்லியில் உள்ள ஈழத்தமிழர் வதைமுகாம்களை இழுத்து மூடு




என்ற ஐந்து கோரிக்கைகளோடு இம்மாநாடு நடைபெற உள்ளது.

மனித உரிமை ஆர்வலர்கள் அனைவரையும், பெருந்திரளாக பங்கு கொள்ள, தமிழக மக்கள் உரிமைக் கழகம் விடுக்கிறது.

சவுக்கு

தாமதிக்கப் பட்ட நீதி மறுக்கப் பட்ட நீதியா ?

கருணாநிதி, முல்லைப் பெரியாறு விவகாரம் தொடர்பாக “தாமதிக்கப் பட்ட நீதி, மறுக்கப் பட்ட நீதி“ என்ற தலைப்பில் அறிக்கை ஒன்று வெளியிட்டுள்ளார். இந்த அறிக்கையில் கருணாநிதி பின்வருமாறு கருத்து தெரிவித்துள்ளார்.

“உச்ச நீதிமன்றம் அல்ல, வேறு எந்த நீதிமன்றமாக இருந்தாலும், அதன் தீர்ப்பை எதிர்த்து நான் கருத்து சொல்வதில்லை. உச்ச நீதிமன்ற தீர்ப்புக் மாறாக ஒரு மாநில அரசு சட்டம் இயற்றிய பிறகும் அதற்காக எந்தவித நடவடிக்கையும் எடுக்காமல் அந்த சட்டத்தை பற்றி எதுவும் கூறாமல், அந்த மாநில கோரிக்கையை ஏற்று தீர்ப்பளிக்கிறது என்றால், ஏன் இப்படி என்ற திகைப்பும், எதற்காக இப்படி என்ற வியப்பும் ஏற்படுமா இல்லையா ?

தாமதிக்கப் பட்ட நீதி மறுக்கப் பட்ட நீதி என்ற பழமொழி பலித்து விடாமல் இருக்க யாரிடம் முறையிடுவது என்றே தெரியவில்லை“ என்று கூறியுள்ளார்.






முதலில் கருணாநிதி தீர்ப்பை மதிக்கிறாரா ? கருணாநிதிக்கு நீதிமன்றங்களின் மேல் மரியாதை உள்ளதா ?

கேரள அரசு நீதிமன்றத் தீர்ப்பை மதிக்காமல், தானே ஒரு சட்டத்தை இயற்றியுள்ளது, அதை உச்ச நீதிமன்றம் கண்டிக்காமல் விட்டு விட்டதே என்று அங்கலாய்க்கும் கருணாநிதி, சென்னை உயர்நீதிமன்றம் அளித்த தீர்ப்பை மதிக்கிறாரா ?

சென்னை உயர்நீதிமன்றம் 4 ஐபிஎஸ் அதிகாரிகளை பணி இடை நீக்கம் செய்யச் சொல்லி 15 நாட்களுக்கு மேல் ஆகிறதே !

இந்தக் கருணாநிதியின் செயலற்ற தன்மை நீதிமன்ற அவமதிப்பாக ஆகாதா ?

யாரை ஏமாற்றுகிறார் கருணாநிதி ?

“கபட நாடகம்“ ஆடுவதில், கருணாநிதியை விஞ்ச யாருமே கிடையாது. கருணாநிதியை நேரடியாக குற்றம் சாட்டவில்லை என்றாலும், உள் துறையின் அமைச்சராக இருக்கும் கருணாநிதியின் கட்டுப்பாட்டில் உள்ள 4 ஐபிஎஸ் அதிகாரிகளை சென்னை உயர்நீதிமன்றம், நீதிமன்ற அவமதிப்பு, துறை நடவடிக்கை, ஆகிய நடவடிக்கைகளை எடுக்கப் போவதாகவும், இதை எடுக்க ஏதுவாக அவர்கள் நால்வரையும் பணி இடை நீக்கம் செய்ய வேண்டும் என்றும் பரிந்துரை செய்திருந்ததே.

பதினைந்து நாட்களாக கருணாநிதி, என்ன செய்கிறார் ? “மானாட மயிலாட“ பார்த்துக் கொண்டிருப்பாரோ ?

சொல்ல முடியாது மானாட மயிலாட பார்க்காமல் அவர் கதை வசனம் எழுத, தற்போது ஷுட்டிங் நடைபெற்றுக் கொண்டிருக்கும் “பெண் சிங்கம்“ பட வேலைகளை கவனித்துக் கொண்டிருப்பார்.

அச்சுதானந்தனாவது பரவாயில்லை, தங்களது மாநிலத்தின் நலனுக்காக உச்ச நீதிமன்ற தீர்ப்பை வளைக்க சட்டம் இயற்றி தங்களின் மாநில நலனை பாதுகாக்கிறார்.

ஆனால் கருணாநிதி ????? வழக்கறிஞர்களை, பொதுமக்களை, நீதிபதிகளை, நீதிமன்ற சொத்துக்களை அடித்து நொறுக்கிய காவல்துறை பொறுக்கிகளை அல்லவா பாதுகாக்கிறார் ?
அயோக்கியத்தனமில்லையா இது ?

எதிர்க்கட்சித் தலைவர் செல்வி ஜெயலலிதா, இத்தீர்ப்பு தொடர்பாக வெளியிட்ட அறிக்கையில் இச்சம்பவத்திற்கு கருணாநிதி உடனடியாக அந்த 4 ஐபிஎஸ் அதிகாரிகளை சஸ்பென்ட் செய்திருக்க வேண்டும், அப்படி செய்யவில்லை என்றால் கருணாநிதி உத்தரவில்தான் இத்தாக்குதல் நடைபெற்றது, ஆகையால் கருணாநிதி இதற்கு நேரடியாக பொறுப்பேற்க வேண்டும், நீதிமன்றம் சென்று, நீதிமன்ற அவமதிப்பு வழக்கை சந்திக்க வேண்டும் என்று அறிக்கை விட்டாரே.

எல்லா அறிக்கைகளுக்கும், ஆந்திராவைப் பார், கேரளாவைப் பார், தமிழகம்தான் அமைதிப் பூங்கா என்று வாய் கிழிய அறிக்கை வெளியிடும் கருணாநிதி, ஜெயலலிதாவின் இந்த அறிக்கைக்கு ஒரே வார்த்தையில், நீதிமன்றம் தன்னைக் கண்டிக்கவில்லை, பாராட்டித்தான் இருக்கிறது என்று முடித்து விட்டார்.

ஆனால், இந்த அதிகாரிகள் ஏன் பணி இடைநீக்கம் செய்யப் படவில்லை என்று ஒரு வார்த்தைக் கூட கூறவில்லை.

முதலைக் கண்ணீர் வடிக்கும் கருணாநிதியின் கபட நாடகத்தை மக்கள் பார்த்துக் கொண்டுதான் இருக்கிறார்கள். விரைவில், தக்க பாடம் புகட்டப் படுவார் கருணாநிதி.

சவுக்கு

அனானிகளை என்ன செய்யலாம் ?

அரசையும், கருணாநிதியையும் எதிர்த்து பதிவுகள் எழுதினால் அனானிகளின் படையெடுப்பு கடுமையானதாக இருக்கிறது. பல நாட்களாக சவுக்கு comment moderation இல்லாமலே இருந்தது. ஆனால் சில அனானிகள் மோசமான சொற்பிரயோகங்களோடு, பிறர் படித்தால் முகம் சுளிக்கும் அளவுக்கு எழுதுகின்றனர். இதனால் வேறு வழியின்றி comment moderation போட வேண்டிய நெருக்கடிக்கு சவுக்கு தள்ளப் பட்டது.

“சவுக்கும்“, சவுக்கின் கருத்துக்களும், விமர்சனங்களுக்கு அப்பாற்பட்டவை அல்ல. எந்த கருத்துக்குமே எதிர் கருத்தும், அதற்கு பதில் கருத்தும் வரவேற்கத் தக்கவையே. இத்தகைய ஆரோக்கியமான கருத்துக்கள் தான் நல்ல விவாதங்களை தோற்றுவித்து, இந்த இணைய ஊடக வடிவத்தை மேலும் செழுமைப் படுத்தும்.

ஆரோக்கியமான மொழியில், எதிர் கருத்துக்களை சவுக்கு எப்போதும் வரவேற்றே வந்திருக்கிறது. அதற்கு மறுமொழி கூறவும் தவறுவதில்லை. ஆனால், இவ்வாறு அவதூறான மொழியில், அனானிகளாய் வந்து கருத்து எழுதுபவர்களுக்கு உளவியல் சிக்கல் இருக்கும் என்றே எண்ணத் தோன்றுகிறது.



அனானிகளில் இரண்டு வகை உண்டு. ஒரு வகை, log in பண்ணுவதற்கு சோம்பேறித்தனம் பட்டுக்கொண்டு, உடனடியாக கருத்து பதிவு செய்ய வேண்டும் என்பதற்காக ஒரு வரி அல்லது இரண்டு வரியிலோ, அல்லது பதிவிலிருந்தோ copy, paste செய்தோ போட்டு விடுபவர்கள் ஒரு வகை.



இரண்டாவது வகைதான் உளவியல் சிக்கலுக்கு ஆட்பட்டவர்கள். நமக்கு பிடிக்காத ஒரு பதிவை, உங்கள் பதிவில் இருந்து “இப்படி“ நான் முரண்படுகிறேன். தங்களது கருத்து “இவ்வாறு“ தவறு என்று எழுத அஞ்சியோ, அல்லது எழுதத் தெரியாமலோ, அல்லது தங்களது வன்மத்தை வெளிப்படுத்தவோ, அவதூறான வார்த்தைகளைப் பயன்படுத்தி, எதையாவது எழுதி விட்டுப் போய்விடுவார்கள். மேலும், எழுதியிருக்கும் பதிவு, சரியாக இருக்கிறதே, இதற்கு மறுப்பு சொல்ல ஒன்றுமே இல்லை என்பதும் ஒரு காரணம். இதை கருத்து ரீதியாக எதிர் கொள்ளத் தெரியாதவர்கள்தான் இவ்வாறான அவதூறு சொற்களைப் பயன்படுத்துகிறார்கள். இதற்கு உளவியல் ரீதியான சிக்கல் இல்லாமல் வேறு என்ன காரணத்தைச் சொல்ல முடியும்.



பொதுக் கழிப்பிடங்களின் சுவற்றில் பல இடங்களில், கெட்ட வார்த்தைகளை எழுதியிருப்பதை பார்த்திருப்பீர்கள். இவ்வாறு, அனானிகளாக வந்து கெட்ட வார்த்தையை எழுதி விட்டு செல்பவர்களுக்கும், பொதுக் கழிப்பிடங்களில் கெட்ட வார்த்தை எழுதுபவர்களுக்கும், பெரிய வித்தியாசம் ஒன்றும் இல்லை.

இவ்வாறு “அனானி“ களாக வந்து கெட்ட வார்த்தை எழுதுபவர்கள் உடனடியாக ஒரு நல்ல மனநல மருத்துவரை பார்ப்பதுதான் நல்லது.




இவர்கள் விரைவில் நலம் பெற “சவுக்கு“ வாழ்த்துகிறது.

இது போகவும், அனானிகளுக்கு ஏதாவது ஆலோசனை இருந்தால் வரவேற்கப் படுகிறது.

சவுக்கு

கடும் நெருக்கடியில் கருணாநிதி… ….

கடந்த 10 நாட்களாக, இலங்கை அகதிகள் மேல், கருணாநிதிக்கு ஏற்பட்டுள்ள “திடீர்“ அக்கறை குறித்து, பலர் அதிர்ச்சியில் ஆழ்ந்துள்ளனர்.

1983ல் இலங்கையில் வெடித்த இனக் கலவரம் காரணமாக ஈழத் தமிழ் மக்கள் அகதிகளாகத் தமிழ் நாட்டுக்கு வரத் தொடங்கினர். 2003 செப்டம்பருக்குப் பிறகு அகதிகளின் வருகை சற்றே நின்றிருந்தது. 31.1.2005 நிலவரப்படி தமிழகத்தில் ஈழத்தமிழ் அகதிகளுக்கென 103 அகதி முகாம்கள் உள்ளன. அவற்றுள் இரண்டு சிறப்பு முகாம்களாகும். மொத்தம் 14,031 குடும்பங்களைச் சோந்த 52,322 பேர் இந்த முகாம்களில் தங்கியிருந்தனர்.


18.06.2006 நாளிட்ட “ஆனந்த விகடன்“ இதழுக்காக, தமிழகத்தில் உள்ள இலங்கை அகதிகளின் நிலை பற்றி, விடுதலைச் சிறுத்தைகள் எம்.எல்.ஏ ரவிக்குமார் எழுதிய கட்டுரை கடைகளில் வெளிவரும் முன்பே, அதிகாலையில் அதைப் படித்து விட்டு, ரவிக்குமாரை தொலைபேசியில் அழைத்து, நீங்களே முகாம்களுக்கு சென்று ஆய்வு நடத்தி ஒரு அறிக்கை தாருங்களேன் என்று கூறினாராம். மு.க.ஸ்டாலின், தயாளு அம்மாளை விட தற்போது, கருணாநிதிக்கு விசுவாசமாக மாறி இருக்கும் ரவிக்குமார், அனைத்து முகாம்களையும் சென்று பார்த்து விட்டு அறிக்கை கொடுத்தாராம்.



இதில் ரவிக்குமாருக்கு இலங்கை அகதிகள் மேல் உள்ள அக்கறை விவாதப் பொருளல்ல. ஆனால், “பனங்காட்டு நரி“யான கருணாநிதி ரவிக்குமாரை தொலைபேசியில் அழைத்து, அறிக்கை சமர்ப்பிக்கச் சொன்னது அகதிகள் மேல் உள்ள அக்கறையால் அல்ல. அப்போது, அதிமுக அணியில் இருந்த விடுதலைச் சிறுத்தைகளை, திமுக வளையத்துக்குள் சிக்க வைக்க வேண்டும் என்ற திட்டம் தான் காரணம். அதன்படியே, அந்த வளையத்தில் சிக்கி, இன்று வெளியே வரமுடியாமல், திருமாவளவனும், ரவிக்குமாரும், மானம், மரியாதை இழந்து, “திருவிழாக் கூட்டத்தில் நிர்வாணப் படுத்தப் படுவதை விட“ மோசமான அவமானத்துக்கு உள்ளாகியும், கருணாநிதியின் காலை நக்கிக் கொண்டிருப்பது “பதவி படுத்தும் பாடு“.

ஆனால், கருணாநிதிக்கு “திடீரென“ இலங்கை அகதிகள் மேல் ஏன் இந்த அக்கறை ? உலகத்தில் யாருக்கும் இல்லாத அக்கறை ? என்பதை ஆராய்கையில் தான், கருணாநிதியின் நயவஞ்சகமும், தணியாத “ஈகோவும்“ இன்று இலங்கை தமிழ் அகதிகளின் மேல் உள்ள பாசமாக வெளிவருகிறது என்பது தெரியும்.

ஈழத்தில் தமிழர்கள், ஈசல்களைப் போல, சிங்கள வெறியர்களின் குண்டுகளுக்கு இரையாகிக் கொண்டிருந்த போது, கண்துடைப்பு நாடகங்களை நடத்திக் கொண்டிருந்தவர்தான் இந்தக் கருணாநிதி என்பதை உலகத் தமிழர்கள் அறிய மாட்டார்களா ?

தமிழினத் தலைவன், நான்தான் தமிழ், தமிழ்தான் என் மூச்சு என்று “முரசொலியில்“ கடிதம் எழுதினால், கருணாநிதியின் உடன்பிறப்புகளே நம்புவதில்லை. உலகத் தமிழர்களா நம்பப் போகிறார்கள் ?

கருணாநிதியின் தமிழினத் துரோகத்தையும், நயவஞ்சகத்தையும், உலகத் தமிழினத்தைத் தவிர மிக நன்றாக அறிந்தவர், அவரோடு ஏறக்குறைய ஐம்பதாண்டுகளாக கூடவே இருக்கும் “பேராசிரியர் அன்பழகன்“. ஆனால், அவர் வாயைத் திறக்கக் கூடாது என்பதற்காகத் தான் கருணாநிதி, அவருக்கு எப்போதும், வெற்றிலையும் சீவலையும் வாங்கி வாயில் அடைத்துள்ளார்.


கருணாநிதியின் தணியாத “ஈகோ“ வை அமைதிப் படுத்தவும், தன் கரங்களில் வீசும் பிண வாடையை அகற்றவும், தன்மேல் படிந்திருக்கும், ஈழத் தமிழரின் ரத்தத்தை துடைக்கவும் விரும்பித்தான் கருணாநிதி “உலகத் தமிழ் மாநாடு“ நடத்தத் திட்டமிட்டுள்ளார்.


ஆனால் இந்த உலகத் தமிழ் மாநாடு நடத்த கருணாநிதி அறிவிப்பு வெளியிட்டதிலிருந்தே, கடும் எதிர்ப்புகள் கிளம்பியபடித்தான் உள்ளன. உலகெங்கம் உள்ள தமிழர்கள் ஈழத்தில் முள்வேலிக்குள் தமிழர்களை அடைத்து வைத்து விட்டும், ஆயிரக்கணக்கான தமிழர்களை சிங்களக் காடையர்களின் கொத்துக் குண்டுகளுக்கு இரையாக்கி விட்டும் ரத்த வாடை போவதற்குள், இந்த “உலகத் தமிழ் மாநாட்டுக்கு“ என்ன அவசியம் என்ற கடும் விமர்சனங்கள் எழுந்து கொண்டுதான் இருக்கின்றன.


இந்த விமர்சனங்கள் கருணாநிதிக்கு இருக்கும், 0.00002 சதவிகித மனசாட்சியை குத்துவதால், இங்கிருக்கும் இலங்கைத் தமிழர்களுக்கு சலுகைகளை அள்ளி வீசுகிறார்.


10 நாட்களுக்கு முன், இந்தியா டுடே வார இதழ் அகதிகள் முகாமில் அவல நிலை பற்றி கட்டுரை ஒன்றை வெளியிட்டது. இதைப் பார்த்தவுடன், மிகவும் மனம் வருந்திய கருணாநிதி, உடனடியாக தமிழகம் முழுவதும், தனது அமைச்சர் மற்றும் பரிவாரங்களை முகாம்களை பார்த்து ஆய்வு நடத்தச் சொன்னார்.


சரி, இது வரை கருணாநிதியும், அவரது அமைச்சர் பரிவாரங்களும், மெச்சிகோ நாட்டிலா இருந்தார்கள் ? தமிழகத்தில் அகதிகளின் அவல நிலை என்ன என்பது தெரியாதா ? இதற்கு 15 நாட்களுக்கு முன்பு கூட, செங்கல்பட்டு, பூந்தமல்லி வதை முகாம்களை இழுத்து மூடு என்று தலைமைச் செயலகம் முன்பு மறியல் நடந்தே… கருணாநிதிக்கு தெரியாதா ? மறியல் செய்தவர்களை, மாலையில் விடாமல், ரிமாண்ட் செய்து புழல் சிறைக்கு அனுப்ப மட்டும் கருணாநிதிக்குத் தெரிகிறதா ? யாரை ஏமாற்ற இந்த நாடகம் ?


ரவிக்குமார் எம்எல்ஏ, 04.07.2006 அன்று, முகாம்களை பார்வையிட்டு தனது அறிக்கையில் 33 பரிந்துரைகளை செய்திருந்தோரே ? அதை மூன்று ஆண்டுகளாக கருணாநிதி ஏன் செயல்படுத்தவில்லை ? ஏனெனில், விடுதலைச் சிறுத்தைகளை கூட்டணி மாறுவதற்காக மட்டுமே, அந்த நாடகத்தை அப்போது அரங்கேற்றினார் கருணாநிதி. காரியம் முடிந்து விட்டதல்லவா ? வசதியாக மறந்து விட்டார்.


இப்போது தமிழர்கள் கொல்லப் படுகையில், உன் பதவியைக் காப்பாற்றிக் கொள்ள எங்களை பழி கொடுத்தாயே என்று ஊரே தூற்றுகிறதல்லவா ?

அரசியல் பிழைத்தோர்க்கு
அறங் கூற்றாவதூ உம்

ஊழ்வினை உருத்து வந்து
ஊட்டும் என்பதூ ஊம்….

என்று சிலப்பதிகாரம் கூறுகிறதல்லவா ? தமிழ் படித்த அறிஞராயிற்றே கருணாநிதி. அதற்காகத்தான், இலங்கை அகதிகளுக்கு நிதியை வாரி வழங்கிக் கொண்டிருக்கிறார்.

இலங்கை தமிழர்களுக்கு எவ்வளவு நிதி வழங்கினாலும், ஈழம் சுடுகாடான போது வாளாயிருந்த உமக்கு “அறமே கூற்றாகும்“.

சவுக்கு